Ә мар хуби сох ки тү, уш вәпичү ә јәхәнтү.
Ә мар хуби сох ки тү, уш вәпичү ә јәхәнтү.
Һәчи рәвојәт әдәт сохтә ки, јә мәрд әдәнбири ә јә чүл-бијобу(бијобон) рәћ рафтә. Јә кәм рәћ рафтә бәгдә, әз гирог рәћ сәс ноләј инсони шинирә. Мәћтәл мундәни; ә инҹиҝәһо чү митану бирә ки, инсонә чүјиҝә бу вә у имдод хоју. Ә сәс нәзник оморәни, ҝәштәни вә дирәни ки. сәс әдәј әз јә сәндугчә оморә. Сәс әдәј минәт сохдә:
— Чәнд рӱзи мә биⱨовунә ә гәд әни сәндугчә дәшәндәт вә гили сохдәт. Ҝиснәјүм, әвир ⱨиломә нәс дирәнүм. Тү бијо рәћм сох, хуби түрә кәм нәсох, мәрә әз и дустоги хилос сох.
Мәрд јә кәм ә хүштә домундәни; ә и сәндугчә кәлә одоми нидору, јәгин ки ⱨәјил тәјфәсини вә комини худосүз овурди шәнди. Ә и ⱨилом һәр чү митанү бирә. Ә нум Худо шукр овурдәни ки, әри хуби вә мисво сохтә ирә ә сәр рәћү вәдировунди. Сәр сәндугчәрә вокундәни вә әз дирәј хүштә мәрд ә дәһшәт оморә. Чү виниҝә хуби: ә гәд сәндугчә јә кәлә мар һәчи гүҹ диромори нүшти вә әдәј ә мәрд дәниширә. Әз чумһој мар әдәј гәзәб тиһи бирә. Јәзугә мәрд әз тәрси хушҝ бирәни мундә. Мар ҹүрт сохтә вушәндәни хүштәрә ә јәхән мәрд вә вәпичирәни ә бугозү:
— Тү гисмәтмәни оморәј вәдироморәј. Имоһој мә түрә бијо хурум ки ҝиснәји мәрә күшүм.
— И чүтәрз бирә? Мә ә тү хуби сохум, тү әмә хәрәби? И ә пишој Худо нәҝүрүмә кори.
— Мәҝәр әз јәр тү вәдарафти, Худо ә мә нәⱨләт хунди. Һич әзуни корһо нисти, мә түрә бијо хурум.
Имоһој мәрд әдәј амбар минәт-синәт сохтә:
— Күлфәт мә кәләји, уһорә сәћибсүз нәјил. Фура әз јәхәнмә, јә кәм сәⱨәр ди хүштәрә, ҝәшт әритү јәм. Чү амбар ә пәсә-пишо әритү јәм, мәрә рәћо сох. И кор тү һич һәг нисти.
— Һәг ҝуфтири? Тү ћәзүр-ћәлво ә дәс мә дәри, вәҝүрүм түрә рәћо дүм ки бурам ҹофо кәшүм әримә јәм бијфум? Мә һәгүм.
И вәхт мәрд винирәни әз дур әдәј јә одоми оморә, ә чүмү үшүг оморәни. бәлкә кумәки сохт. Әз мар ҝуфтирәни:
— Виниш, әри әну одоми ихтилот имурә ҝујим. Әҝәр ҝуфтиҝә тү һәги, мә дијә чү миданум ҝуфтирә. — әһәчирәво мәрдә војист тәјтә одоми расирә мара сокит соху.
Мар рази бирәни. Одоми оморәни расирәни вә ихтилотә ҝуш вокундәни, јә кәм ә хүштә домундә бәгдә әз мәрд ҝуфтирәни:
— Түрә ⱨәјб нәс оморә, кәлә мәрди тү, дурҝу ҝоф сохтәни. Ә и кәләји мар ә гәд әни сәндугә чүтәрз доруштәбу ки тү урәш әз гәд әну хилос сохи.
Бичорәјә мәрд дәсһо-појһојү дијәш ләрзирәни, сәвҝәнд хундәни ки әдәј дуз ҝуфтирә:
— Бовор нәс сохтә, пүрс әз мар.
Одоми сәрә бәрдәни-овурдәни пүрсирәни әз мар:
— Һич боворим нисти. У дуз ҝуфтирә?
Мар:
— Әри, әдәј дуз ҝуфтирә.
Одоми сәс хүштәрә зәвәр сохтәни вә ә ћүршәво:
— Түш әдәј гәләт сохтә, дурҝу ҝуфтирә. Тү ә гәд әни сәндугчә дәбири?
Мар муҝу — әри.
— Һәчи буҝә бурбун виним. Әҝәр дорушдиҝә и мәрдә әдәм ә тү ћолол сохтә. Фумундәниҝә ә тү һичиш нирасү.
Мар ә ћүршәво әз јәхән фураморәни вә гүҹ бирә дарафтәни ә гәд сәндугчә. Одоми ҹәлд сәр ән сәндугчәрә бәстәни вә ҝуфтирәни:
— Зу бош гилирә бәст. Ҹиҝәј әни һә и гилијә сәндугчәји.
И одоми әз тараф Худо шолијәћ бирә әри әни мәрд вә у әз дәс мар хилос бирәни. Ә ирәво имрӱзи ихтилот имуш варастәни.
Һәмишә шолијәћлү ҝәрдошит. Ә сохтә никиһошму Худо һәмишә ники вәдировуно ә пишошму.
Москва 2020.
Геник Исаков